Israel yarekuye imfungwa 30 z’Abanya-Palestine yari yarafunze nyuma y’uko abaturage bayo 10 n’abanyamahanga babiri bari barafashwe bugwate na Hamas barekuwe.
Ni igikorwa cyabaye kuri uyu wa kabiri tariki 28 Ugushyingo 2023, kibaye mu minsi itandatu yashyizweho hagati y’impande zombi cyo kurekura imbohe zari zarafunzwe. Magingo aya, Israel imaze kurekura Abanya-Palestine 180 barimo abagore n’abana mu gihe Hamas yo imaze kurekura abantu 81 biganjemo abaturage ba Israel.
Hagati aho, Ingabo za Israel zafunze inzira zose zinjira mu Mujyi wa Gaza, zishyiraho za bariyeri impande zose ku buryo abantu binjira n’abasohoka bagomba kugenzurwa.
Imirwano iracyakomeje mu bice bitandukanye hagati y’Ingabo za Israel n’umutwe wa Hamas, ndetse ku wa Kabiri bivugwa ko abantu bayikomerekeyemo.
Kuva imirwano yatangira, abantu 15000 bo muri Gaza nibo bayiguyemo. Muri bo, abana ni 6150 mu gihe abagore ari 4000. Abakomeretse muri rusange ni 36.000.
Hagati aho kandi hari abantu 6800 bimaze gutangazwa ko baburiwe irengero.
Ku rundi ruhande, bibarwa ko abantu 242 bamaze kwicirwa mu gace ka West Bank barimo abana 57 mu gihe abakomeretse ari 2750.
Muri Israel ho, abamaze gupfa ni 1200 mu gihe abakomeretse ari 5600.
UBWANDITSI: umuringanews.com
